இலங்கைக்கு செல்லும் இந்திய அணி by CricketArchive

---

Event:

India in Sri Lanka 2008

---

DateLine: 8th July 2008

 

மும்பை, ஜூலை, 8: இலங்கையில் துவங்கவிருக்கும் டெஸ்ட் தொடருக்கான இந்திய அணி தேர்வு இன்று மும்பையில் நடை பெற்றது. இந்திய கிரிக்கெட் அணியின் மும்மூர்த்திகளான சச்சின், கங்குலி, டிராவிட் இடம்பிடித்துள்ளார்கள்.

 

இலங்கைக்கு சுற்றுப்பயணம் செல்லும் இந்திய அணி 3 டெஸ்ட் மற்றும் 5 ஒருநாள் போட்டி கொண்ட தொடரில் ஆடவிருக்கிறது. இரு அணிகளும் மோதும் முதல் டெஸ்ட் போட்டி இம்மாதம் 23ம் தேதி இலங்கையில் துவங்குகிறது. வெங்சர்க்கார் தலைமையிலான தேர்வுக்குழு டெஸ்ட் அணியை இன்று மும்பையில் தேர்வு செய்தது.

 

இந்நிலையில் இந்திய கிரிக்கெட் கட்டுப்பாட்டு வாரியச் செயலர் நிரஞ்சன் ஷாவை சந்தித்த தோனி, தனக்கு ஓய்வு தேவைப்படுவதால் டெஸ்ட் தொடரில் தன்னை சேர்த்துக்கொள்ள வேண்டாமென்று கேட்டுக் கொண்டார். தோனியின் முடிவை இந்திய கிரிக்கெட் கட்டுப்பாட்டு வாரியம் ஏற்றுக் கொண்டது.

 

தோனிக்குப் பதிலாக டெஸ்ட் அணியில் விக்கெட் கீப்பராக பார்த்தீவ் படேல், தினேஷ் கார்த்திக் சேர்க்கப்பட்டுள்ளார்.

 

காயம் காரணமாக உடற்தகுதி பிரச்னையால் சமீபத்தில் நடைபெற்ற ஓருதின தொடர்களில் இருந்து விலகிக்கொண்ட சச்சின் தெண்டுல்கர், தற்போது விளையாடுவதற்கேற்ற உடற்தகுதியைப் பெற்றுள்ளதால் அவர் அணியில் சேர்க்கப்பட்டுள்ளார்.

 

வங்கதேச முத்தரப்பு தொடர் மற்றும் ஆசிய கோப்பையில் நீக்கம் செய்யப்பட்டிருந்த சௌவுரவ் கங்குலி, ராகுல் திராவிட் வி.வி.எஸ்.லட்சுமண் ஆகியோர் அணியில் இடம் பிடித்துள்ளனர்.

 

சமீபகாலமாக அட்டகாசமாக ஆடிவரும் இந்திய அணியின் துவக்க ஆட்டக்காரர்களான வீரேந்திர ஷேவாக் - கௌதம் காம்பிர் மீது தேர்வுகுழுவின் கவனத்தை ஈர்த்துள்ளதால் அவர்களும் அணியில் சேர்க்கப்பட்டுள்ளனர்.

 

தவிர, ஸ்ரீசாந்தை அறைந்ததால் தண்டனைக்குள்ளான ஹர்பஜன் சிங்கும் அணியில் இடம்பிடித்துள்ளார். அவருக்கு துணையாக சுழலில் கலக்குவதற்கு புதுமுகம் பிரக்யான் ஓஜா சேர்க்கப்பட்டுள்ளார். வேகத்திற்கு ஜாகிர்கான், இஷாந்த் சர்மா, முனாப் படேல், ஆர்.பி.சிங் ஆகியோர் சேர்க்கப்பட்டுள்ளனர்.

 

இந்திய அணி விவரம்: அனில் கும்ப்ளே (கேப்டன்), சச்சின் தெண்டுல்கர், சௌவுரவ் கங்குலி, ராகுல் திராவிட், வீரேந்திர ஷேவாக், வி.வி.எஸ்.லட்சுமண், கௌதம் காம்பிர், ரோஹித் சர்மா, பார்த்தீவ் படேல் (விக்கெட் கீப்பர்), தினேஷ் கார்த்திக் (விக்கெட் கீப்பர்), ஜாகீர்கான், ஹர்பஜன் சிங், இஷாந்த் சர்மா, பிரக்யான் ஓஜா, முனாப் படேல். ஆர்.பி.சிங்.

 

இலங்கையுடன் மோத உள்ள 3 டெஸ்ட் போட்டிகளின் விவரம்: முதல் டெஸ்ட் போட்டி கொழும்பில் ஜூலை 23 முதல் 27-ம்தேதி வரையிலும், 2-வது டெஸ்ட் போட்டி காலேவில் ஜூலை 31 முதல் ஆகஸ்ட் 4-ம்தேதி வரையிலும், 3-வது டெஸ்ட் போட்டி கொழும்பில் ஆகஸ்ட் 8 முதல் 12-ம்தேதி வரையிலும் நடைபெற உள்ளன.