இந்தியாவிற்கு எதிரான இலங்கை ஒருதின அணி by CricketArchive

---

Event:

India in Sri Lanka 2008

---

DateLine: 9th August 2008

 

கொழும்பு, ஆகஸ்டு, 9: இந்திய அணிக்கு எதிரான ஒரு தினத்தொடர் மற்றும் சாம்பியன்ஸ் டிராபி தொடருக்கான இலங்கை அணி அறிவிக்கப்பட்டுள்ளது.

 

இந்தியாவிற்கு எதிராக துவங்கவிருக்கும் ஒரு தினத்தொடர் மற்றும் சாம்பியன்ஸ் டிராபி தொடருக்கான இலங்கை அணி தேர்வு நேற்று கொழும்புவில் நடை பெற்றது. இலங்கை அணியின் வேகப்பந்து வீச்சாளர்களான தில்ஹாரா பெர்னாண்டோவும், பர்வீஸ் மஹரூப்பும் மீண்டும் அணியில் இடம் பிடித்துள்ளனர்.

 

இலங்கையில் சுற்றுப்பயணம் மேற்கொண்டுள்ள இந்திய அணி 3 டெஸ்ட் மற்றும் 5 ஒருநாள் போட்டி கொண்ட தொடரில் ஆடவிருக்கிறது. இந்நிலையில், வரும் 18-ம் தேதி முதல் துவங்க இருக்கும் ஒரு தினத் தொடரில் விளையாடவுள்ள இலங்கை அணியை அர்ஜுன ரணதுங்கா தலைமையிலான தேர்வுக்குழு நேற்று கொழும்புவில் தேர்வு செய்தது.

 

காயம் காரணமாக இந்தியாவிற்கு எதிரான டெஸ்ட் தொடரில் இடம்பெறாமல் போன வேகப்பந்து வீச்சாளர்களான தில்ஹாரா பெர்னாண்டோவும், பர்வீஸ் மஹரூப்பும் ஒருதினத் தொடரில் இடம்பிடித்துள்ளனர். ஆனால் பர்வீஸ் மஹரூப்பிற்கு காயம் இன்னும் குணமடையாததால் இந்தியாவிற்கு எதிரான ஒரு தினத்தொடரில் சேர்க்கப்படவில்லை. சாம்பியன்ஸ் டிராபி தொடரில் இடம்பிடித்துள்ளார்.

 

ஆல்ரவுண்டரான குஷால் வீரரத்னே இந்தியாவிற்கு எதிரான ஒரு தினத்தொடரில் பர்வீஸ் மஹரூப்பிற்கு பதிலாக தேர்வு செய்யப்பட்டுள்ளார். இத்தொடரில் விளையாட இருந்த ஜேகன் முபாரக் தென்னாப்பிரிக்கா ஏ அணியிடன் விளையாட உள்ளதால் அவர் பெயர் சேர்க்கப்படவில்லை. இதனால் 14 பேர் கொண்ட இலங்கை அணி அறிவிக்கப்பட்டுள்ளது.

 

இந்தியாவிற்கு எதிரான ஒருதின அணியின் விவரம்: மஹேல ஜெயவர்தனே (கேப்டன்), சனத் ஜெயசூர்யா, குமார் சங்ககாரா (விக்கெட் கீப்பர்), சமர கபுகேதரா, சமரசில்வா, திலகரத்னே தில்ஷான், சமிந்தா வாஸ், குஷால் வீரரத்னே, திலன் துஷாரா, நுவன் குலசேகரா, முத்தையா முரளிதரன், அஜந்தா மெண்டிஸ், மஹேல உடவாட்டே, தில்ஹாரா பெர்னாணெடோ.

 

பாகிஸ்தானில் நடைபெற உள்ள சாம்பியன்ஸ் டிராபி தொடருக் கான 15 பேர் கொண்ட அணி விவரம்: மஹேல ஜெயவர்தனே (கேப்டன்), சனத் ஜெயசூர்யா, குமார் சங்ககாரா (விக்கெட் கீப்பர்), சமர கபுகேதரா, சமரசில்வா, திலகரத்னே தில்ஷான், சமிந்தா வாஸ், பர்வீஸ் மஹரூப், திலன் துஷாரா, நுவன் குலசேகரா, முத்தையா முரளிதரன், அஜந்தா மெண்டிஸ், மஹேல உடவாட்டே, தில்ஹாரா பெர்னாணெடோ, ஜேகன் முபாரக்.

 

இந்தியாவுடன் மோத உள்ள 5 ஒருதினப்போட்டிகளின் விவரம்: முதல் போட்டி ஆகஸ்டு 18-ஆம் தேதியும், 2-வது போட்டி ஆகஸ்டு 20-ஆம் தேதியும் நடைபெறுகிறது. இந்த இரண்டு போட்டிகளும் தம்புல்லா மைதானத்தில் பகல் ஆட்டமாக நடைபெற உள்ளது.

 

3-வது போட்டி ஆகஸ்டு 24-ஆம் தேதியும், 4-வது போட்டி ஆகஸ்டு 26-ஆம் தேதியும், 5-வது போட்டி ஆகஸ்டு 28-ஆம் தேதியும் நடைபெறுகிறது. இந்த கடைசி மூன்று போட்டிகளும் கொழும்புவில் உள்ள பிரேமதேசா மைதானத்தில் பகலிரவு ஆட்டமாக நடைபெற உள்ளது.